Háskóli Íslands

Smitferill gammaherpesveira í folöldum

Út er komin ný grein um áhrif móðurmótefna á magn gammaherpesveira og mótefnasvars hjá folöldum. Greinin birtist í PLOS ONE og er rannsóknin hluti af doktorsverkefni Lilju Þorsteinsdóttur.

Útdráttur:

Hestar hýsa tvær gerðir gammaherpsveira, EHV-2 og EHV-5. Folöld smitast af móður um og fá ónæmisvarnir frá henni með broddmjólk fyrstu mánuðina, þar til ónæmiskerfið er þroskað. Markmið verkefnisins var að kanna smitferil gammaherpesveira í folöldum og mæðrum þeirra frá köstun að tveggja vetra aldri. Tekin voru blóð- og nefstrokssýni úr 15 folöldum fyrstu tvö æviárin og úr mæðrunum sex mánuði eftir köstun.

EHV-2 ræktaðist fyrst úr 5 daga gömlu folaldi og EHV-5 á degi 12, fyrr en áður hefur verið birt. Með erfðamögnun fannst EHV-2 fyrst á degi 2 og EHV-5 á degi 11. Enginn sértæk EHV-2/5 mótefni greindust hjá folöldunum áður en þau komust á spena, en EHV-2/5-IgG mótefni mældust strax eftir inntöku á broddmjólk. Mótefnin féllu jafnt og þétt og voru í lámarki við 2-4 mánaða aldur, á sama tíma og mest fannst af EHV-2. Við 3 mánaða aldurinn voru folöldin jafnframt öll jákvæð í veiruræktun. Á hinn bóginn fannst mest af EHV-5 í folöldunum þegar þau voru í kringum eins árs. Magn móðurmótefna hafði greinileg áhrif á veirubyrgði og eigin mótefna framleiðslu folaldanna.  

Rannís, Rannsóknasjóður HÍ, Framleiðnisjóður landbúnaðirins og Stofnverndarsjóður íslenska hestsins styrktu rannsóknina.

 

Þú ert að nota: brimir.rhi.hi.is