Háskóli Íslands

Páll Agnar Pálsson, aldarminning

Í dag eru eitt hundrað ár frá fæðingu Páls Agnars Pálssonar dýralæknis, en hann lést 10. júlí 2003. Páll Agnar var meðal fyrstu sérfræðinga Tilraunastöðvar Háskóla Íslands í meinafræði að Keldum þegar starfsemin hófst fyrir rúmlega sjötíu árum og hafði starfsaðstöðu hér í fimm áratugi. Hann var dýralæknamenntaður frá Dýralækna- og Landbúnaðarháskólanum í Kaupmannahöfn og sótti viðbótarmenntun í sýkla- og meinafræði húsdýra víðar erlendis. Páll Agnar átti farsælan feril sem brautryðjandi á Tilraunastöðinni í ýmsum rannsókna- og greiningaverkefnum tengdum dýrasjúkdómum. Einnig vann hann ötullega að því að fyrirbyggja dýrasjúkdóma og útrýmingu þeirra. Eftir hann liggur langur ritlisti vísinda- og fræðigreina.  Þar er um að ræða sérhæfðar niðurstöður vísindarannsókna og ítarlegan fróðleik um ýmsa dýrasjúkdóma og baráttuna við þá. Páll Agnar gegndi stöðu forstöðumanns Tilraunastöðvarinnar í tæpan áratug og stöðu yfirdýralæknis í rúmlega þrjá áratugi.  Stefnt er að því að halda málþing til heiðurs Páli Agnari Pálssyni í haust.

Þú ert að nota: brimir.rhi.hi.is