Háskóli Íslands

Ný grein um sumarexem og ofnæmisvaka í byggi

Ofnæmisvakar framleiddir í byggi eru hentugir til þess að mæla ónæmissvörun hjá bólusettum hestum

Sumarexem í hrossum er IgE-miðlað ofnæmi gegn próteinum úr bitkirtlum smámýstegunda af ættkvíslinni Culicoides spp. Ofnæmið er vandamál í íslenskum hestum sem fluttir eru út en orsakavaldurinn lifir ekki á Íslandi. Á Keldum er verið að þróa ónæmismeðferð gegn sumarexemi. Til þess að mæla árangur ónæmismeðferðar þarf verulegt magn af hreinum ofnæmisvökum. Bornir voru saman hreinsaðir ofnæmisvakar framleiddir í þremur tjáningarkerfum; E. coli, skordýrafrumum og byggi. Prótein framleidd í E.coli eru oft erfið í hreinsun og mjög dýrt er að framleiða prótein í skordýrafrumum. Framleiðsla próteina í byggfræjum er hinsvegar hagkvæmur kostur, fræin eru náttúrulegur geymslustaður próteina og eru án óæskilegra efna sem auðveldar hreinsun próteinanna. Byggframleiddu próteinin voru jafngóð eða betri en þau sem framleidd voru í E. coli og skordýrafrumum bæði fyrir mælingu á mótefna- og boðefnasvari hesta sem höfðu verið bólusettir með samsvarandi próteinum framleiddum í E. coli. Verið er að rannsaka hvort hægt sé að nota próteinin til að skoða svörun hesta með sumarexem.

Rannsóknina styrktu; Rannsóknasjóður RANNÍS, Framleiðnisjóður landbúnaðarins, Eimskipafélagssjóður Háskóla Íslands, og Svissneski rannsóknarsjóðurinn.

Sjá grein eftir Sigríði Jónsdóttur, Söru Björk Stefánsdóttur, Sæmund Bjarna Kristínarson, Vilhjálm Svansson, Jón Má Björnsson, Örnu Rúnarsdóttur, Bettina Wagner, Eliane Marti, og Sigurbjörgu Þorsteinsdóttur sem birt er í Veterinary Immunology and Immunopathology, Barley produced Culicoides allergens are suitable for monitoring the immune response of horses immunized with E. coli expressed allergens, vol 201, July 2018, Pages 32-37.

 

 

Þú ert að nota: brimir.rhi.hi.is